કેન્દ્ર સરકારનું પોર્ટ ઇન્ફ્રાસ્ટ્રક્ચરમાં મોટું રોકાણ, ₹427.8 કરોડના ખર્ચે 7 પ્રોજેક્ટ શરૂ

ઓડિશાના પારાદીપ પોર્ટની ક્ષમતા અને કાર્ગો હેન્ડલિંગ કાર્યક્ષમતા વધારવા મોટા પાયે ઇન્ફ્રાસ્ટ્રક્ચર વિકાસ હાથ ધરાયો છે. કેન્દ્રીય બંદર, શિપિંગ અને જળમાર્ગ મંત્રી સર્બાનંદ સોનોવાલે ₹427.80 કરોડના 7 પ્રોજેક્ટનું ઉદ્ઘાટન કર્યું છે, જ્યારે ₹1,580.36 કરોડના ત્રણ મશીનાઇઝેશન પ્રોજેક્ટ માટે કરાર કરવામાં આવ્યા છે.

કાર્ગો હેન્ડલિંગ ક્ષમતા વધારવાનો હેતુ

નવા પ્રોજેક્ટમાં નેવિગેશન, કનેક્ટિવિટી, સુરક્ષા, ટકાઉપણું અને અન્ય પોર્ટ ઇન્ફ્રાસ્ટ્રક્ચરનો સમાવેશ થાય છે. આ યોજનાઓનો હેતુ કાર્ગો લોડિંગ-અનલોડિંગની કાર્યક્ષમતા સુધારવા, જહાજોનો turnaround time ઘટાડવા અને લોજિસ્ટિક્સ ખર્ચમાં ઘટાડો કરવાનો છે.

₹352 કરોડથી ઊંડા ડ્રાફ્ટની સુવિધા

મુખ્ય પ્રોજેક્ટમાં ₹352 કરોડના ખર્ચે 18.5 મીટર ઊંડા ડ્રાફ્ટની સુવિધાનો વિકાસ સામેલ છે. આ સુવિધાથી પારાદીપ પોર્ટના આંતરિક વિસ્તારમાં સંપૂર્ણ લોડેડ મોટા માલવાહક જહાજોને હેન્ડલ કરવાની ક્ષમતા વધશે.

500 મીટરનો ત્રણ લેનનો બ્રિજ

પોર્ટ વિસ્તારમાં આંતરિક કનેક્ટિવિટી અને ઓપરેશનલ કાર્યક્ષમતા સુધારવા 500 મીટર લાંબો ત્રણ લેનનો બ્રિજ પણ બનાવવામાં આવશે. મશીનાઇઝેશન અને કનેક્ટિવિટી પ્રોજેક્ટ પૂર્ણ થયા બાદ પારાદીપ પોર્ટની કાર્ગો હેન્ડલિંગ ક્ષમતા વધુ મજબૂત થવાની અપેક્ષા છે.