ગુજરાતમાં દિવ્યાંગ વાહનચાલકોને રાહત, સાઇડકારવાળી મોટર સાઇકલના રજીસ્ટ્રેશનને મળી મંજૂરી

ગુજરાતમાં શારીરિક અને મનો-દિવ્યાંગજનોની ગતિશીલતા સરળ બનાવવા સાઇડકાર જોડાયેલી મોટર સાઇકલના રજીસ્ટ્રેશન અને જરૂરી ફેરફારને મંજૂરી આપવામાં આવશે. વાહન વ્યવહાર કમિશનરની કચેરીએ આ અંગે પરિપત્ર જાહેર કર્યો છે. નવી વ્યવસ્થા રાજ્યની તમામ RTO અને ARTO કચેરીઓમાં લાગુ થશે અને તેમાં સુરક્ષા માટે ખાસ શરતો નક્કી કરવામાં આવી છે.

શારીરિક દિવ્યાંગજનોને મળશે મંજૂરી

શારીરિક દિવ્યાંગ વ્યક્તિ માટે કેન્દ્ર સરકારના માર્ગદર્શક ધોરણો મુજબ સાઇડકાર જોડાયેલી મોટર સાઇકલનું રજીસ્ટ્રેશન અથવા વાહનમાં જરૂરી ફેરફાર કરવાની મંજૂરી આપી શકાશે. આ વ્યવસ્થાનો હેતુ દિવ્યાંગ વ્યક્તિઓ માટે દૈનિક મુસાફરી વધુ સુગમ અને સ્વતંત્ર બનાવવાનો છે.

મનો-દિવ્યાંગજનો માટે અલગ શરતો

મનો-દિવ્યાંગ વ્યક્તિ માટે વાહનનું સંચાલન કાયદેસરના વાલી અથવા તેમની જાણ અને સંમતિથી અધિકૃત વ્યક્તિ દ્વારા કરવાનું રહેશે. વાહન ચલાવતી વ્યક્તિ પાસે સંબંધિત વર્ગનું માન્ય ડ્રાઇવિંગ લાઇસન્સ હોવું ફરજિયાત રહેશે.

ઝડપ 40 કિમી પ્રતિ કલાકથી વધુ નહીં

સાઇડકારવાળી મોટર સાઇકલની ઝડપ કોઈ પણ સંજોગોમાં 40 કિમી પ્રતિ કલાકથી વધુ રાખી શકાશે નહીં. વાહનચાલક અને મનો-દિવ્યાંગ મુસાફર માટે હેલ્મેટ ફરજિયાત રહેશે. સાઇડકારમાં સીટ બેલ્ટ અથવા અન્ય યોગ્ય સલામતી વ્યવસ્થા પણ હોવી જરૂરી રહેશે.

મંજૂરી પહેલાં વાહનનું નિરીક્ષણ

રજીસ્ટ્રેશન અથવા ફેરફારની મંજૂરી પહેલાં મોડિફાઇડ વાહનનું ભૌતિક નિરીક્ષણ કરવામાં આવશે. ફેરફારથી વાહનચાલક, દિવ્યાંગ મુસાફર અથવા અન્ય માર્ગ વપરાશકર્તાઓની સલામતી જોખમમાં ન આવે તેની ખાતરી કરવામાં આવશે. વાહન માટે માન્ય Comprehensive Insurance Policy અને ઓછામાં ઓછું Third Party Risk Cover પણ જરૂરી રહેશે.